Bem-vindu mai iha informasaun kona-ba Uma Lulik Munisípiu Lautém, patrimóniu kulturál ida ne’ebé importante tebes ba povu Timor-Leste. Uma Lulik la’ós deit uma tradisionál, maibé simboliza identidade, istória, no relasaun espirituál entre bei-ala sira, komunidade, no jerasaun foun.

Iha Munisípiu Lautém, Uma Lulik sira reflete riqueza kultura no tradisaun husi komunidade lokal, liuliu povu Fataluku. Kada Uma Lulik iha nia istória, arquitetura, no valor kulturál rasik, ne’ebé transmite husi jerasaun ba jerasaun durante tinan barak. Iha ne’e mak rai sasán sagradu, hala’o serimónia tradisionál, no foti desizaun importante ba komunidade.

Website ida ne’e kria atu introdús, dokumenta no promove Uma Lulik iha Munisípiu Lautém. Objetivu principal mak atu fó informasaun kona-ba nia istória, arquitetura, valor kulturál, no papel importante ne’ebé Uma Lulik kontinua desempenha iha moris komunidade ohin loron. Ho website ida ne’e, espera katak visitante sira bele komprende no valoriza patrimóniu kulturál ida ne’e, nune’e mos partisipa iha esforsu atu preserva no transmite ba jerasaun sira tuirmai.

Lautém oferese esperiénsia turístika ne’ebé kompletu, husi tasi ho bee mutin no bee moos, foho no ai-laran matak, to’o lagoa boot, rai protejidu, no Uma Lulik tradisionál ne’ebé sai simbolu identidade no kultura povu Fataluku. Fatin turístiku importante balun inklui Ilha Jaco, Praia Valu Sere, Parque Nasionál Nino Konis Santana, Lagoa Ira-Lalaro, Lagoa Umunira, Foho Paitchau, no Gruta Ili-Kere-Kere, ne’ebé hatudu riqueza natureza no patrimóniu istóriku munisípiu nian.

Ho nia paisajen natural ne’ebé seidauk estraga, biodiversidade ne’ebé aas, no kultura tradisionál ne’ebé sei preserva di’ak, Lautém sai destinasaun ideal ba ema sira ne’ebé hakarak deskobre beleza natureza, halo trekking, hiking, snorkelling, no aprende kona-ba istória no kultura Timor-Leste.

Mai vizita Munisípiu Lautém no deskobre beleza natureza, kultura, no patrimóniu ne’ebé halo munisípiu ida ne’e sai destinasaun turístika ida ne’ebé úniku iha Timor-Leste.